دانش کدہ……مشتاق احمد قریشی
شیطان کی حقیقت قرآن کی روشنی میں
بِسْمِ اﷲِ الرَّحْمٰنِ الرَّحِیْمِ

ترجمہ :۔اور جب فیصلہ چکا دیا جائے گا تو شیطان کہے گا ’’حقیقت تو یہ ہے کہ اللہ نے جو وعدے تم سے کئے تھے وہ سب سچے تھے اور میں نے جتنے وعدے کئے ان میں سے کوئی بھی پورانہ کیا۔میرا تم پر کوئی زور تھا ہی نہیں میں نے اس کے سوا کچھ نہیں کیاکہ اپنے راستے کی طرف تمہیں دعوت دی اورتم نے میری دعوت پر لبیک کہا۔اب مجھے الزام نہ دو‘خود اپنے آپ کو ملامت کرو‘یہاںنہ میں تمہاری فریادرسی کر سکتا ہوں اور نہ تم میری فریادرسی کرسکتے ہو۔اس سے پہلے جو تم نے مجھے اللہ کا شریک بنا رکھا تھا اس سے میں بری الذمہ ہوں‘ایسے ظالموںکے لئے دردناک عذاب کی سزا یقینی ہے۔ (ابراہیم۔ ۲۲)
آیت مبارکہ میں اللہ تبارک وتعالیٰ نے روز محشر کانقشہ کھینچا ہے جب سب کی سب مخلوقات کو زندہ کرکے اللہ تعالیٰ کی عدالت میں پیش کیاجائے گا اور ہر ایک کا حساب ہورہا ہوگا۔ جب راہ حق پر چلنے والے اہل ایمان کو جنت کی طرف بھیج دیاجائے گا تو اہل دوزخ کا حساب کتاب شروع ہوگا تب اللہ تبارک وتعالیٰ اہل دوزخ جنہوں نے اپنی دنیا کی زندگی اپنے حساب سے عیش وآرام میں شیطان کے بہکائے میں آکر اس کی پیروی کرتے گزاری ہوگی دریافت کرے گا کہ تم نے راہ حق کیوں نہیں اپنائی جبکہ تمہیں ہر قسم کی ہدایت ورہنمائی پہنچادی گئی تھی جیسا کہ اس سورۂ کی آیت ۲۱ میں ارشاد باری ہے وہ جواب دیں گے اگر اللہ نے ہمیں نجات کی کوئی راہ دکھائی ہوتی تو ہم ضرور تمہیں دکھاتے اب تو سب یکسا ں ہے چاہے بے قراری کریں یا صبر دونوں ہی برابر ہیں ہمارے بچنے کی کوئی صورت نہیں۔‘‘ اہل جہنم آپس میں ہی باتیں کریں گے کہ جنیتوں کو جنت اس لئے ملی ہے کہ وہ اللہ کے سامنے روتے اورگڑگڑاتے تھے۔ آئو ہم بھی اللہ کی بارگاہ میں آہ وزاری کریں شاید اللہ ہمیں بھی معاف کردے۔پھر وہ خوب روئیں گے آہ وزاری کریں گے لیکن انہیں اس کا کوئی فائدہ نہیں ہوگا‘ پھر وہ باہم مشورہ کریں گے کہ جنتیوں کو جنت ان کے صبر کی وجہ سے ملی ہے آئوہم بھی صبر کرتے ہیں‘ پھر وہ صبر کا بھرپور مظاہرہ کریں گے‘لیکن انہیں اس کابھی کوئی فائدہ نہیں ہوگا‘ پھر وہ سب کے سب کہیں گے اب ہم چاہے کچھ بھی کرلیں کوئی فائدہ نہیں ہوگا‘اب چھٹکارے کی کوئی صورت نہیں ہے۔ ان اہل دوزخ کی یہ گفتگو ومکالمے قرآن حکیم میں کئی جگہ بیان ہوئے ہیں۔ مثلاً سورۃ مومن ۴۷‘۴۸ سورۃاعراف ۳۸‘۳۹ سورۃ الاحزاب ۶۶‘۶۸ اس کے علاوہ آپس میں بھی جھگڑیں گے اورایک دوسرے پہ الزامات لگائینگے امام ابن کثیر کے قول کے مطابق ان کا جھگڑا میدان حشر میں ہوگا اس کی تفصیل سورۃ سبا کی آیت ۳۱‘ ۳۳ میں بیان فرمائی گئی ہے۔جب اہل جہنم میں چلے جائیں گے تو شیطان ان جہنمیوں سے کہے گا‘ تمہارے گلے شکوے اس حد تک تو درست ہیں کہ اللہ سچا ہے اور میں جھوٹا ہوں‘ اللہ نے جو وعدے اپنے پیغمبروں کے ذریعے کئے تھے کہ نجات میرے پیغمبروں پر ایمان لانے میں ہے‘ وہ حق تھے‘ ان کے مقابلے میں میرے تمام وعدے توسراسر دھوکہ اور فریب تھے‘ میں نے تمہیں جو امیدیں دلائیں جن فائدوں کے لالچ تمہیں دیئے‘ جن خوش نما توقعات کے جال میں تم کو پھانسا اور سب سے بڑھ کر تمہیں یہ یقین دلایا کہ اول تو آخرت کچھ نہیں ہے بس یہ دنیا ہی دنیا ہے وہ سب تو میرا ڈھکوسلا تھا اور یہ بھی کہ جب میں نے تمہیں سمجھایا کہ فلاں حضرت بڑے پہنچے ہوئے ہیں ان کی تصدیق سے تم صاف بچ نکلوگے‘ بس ان کی خدمت میں نذرو نیاز کی رشوت پیش کرتے رہو پھر جو جی چاہے کرتے پھرو تمہیں فکر کرنے کی کوئی ضرورت نہیں حضرت جی ہیں نا‘نجات کا ذمہ ان کا ہے یہ ساری باتیں تو میرا وہ حربہ تھیں جن میں پھنسا کرمیں نے تمہیں راہ حق سے ہٹایا میں نے تو تمہیں صرف مشورہ ہی دیا تھا عمل تو تم نے خود کیا تھا قصور تو سراسر تمہارا ہے کہ تم نے کیوں میری بات مانی۔
وہ اپنی صفائی میں کہے گا کیا تم یہ ثابت کرسکتے ہو کہ تم خود راہ راست پر چلنا چاہتے تھے اور میں نے زبردستی تمہارا ہاتھ پکڑ کر تمہیں راہ حق سے ہٹایا تو ضرور ثابت کرو پھر جو چاہو مجھے سزا دو میں مان لوں گا‘تم خود اگر چاہتے اور کوشش کرتے تو دعوت حق کو قبول کرتے میں نے تو صرف اتنا کیا ہے کہ حق کے مقابلے میں تمہیں باطل کی دعوت دی‘ سچائی کے مقابلے میں جھوٹ وفریب کی طرف تمہیں بلایا‘ نیکی کے مقابلے میں بدی کی طرف تمہیں پکارا اس کی سزا مجھے ملی ہے میں بھی تمہارے ساتھ جہنم واصل ہوچکا ہوں لیکن تمہیں جو سزا ملی ہے اس کے ذمہ دار تم خود ہو اپنے غلط انتخاب اور اپنے اختیار کے غلط استعمال کی ذمہ داری تمہاری اپنی ہے۔ میری باتوں میں نہ کوئی دلیل تھی نہ ہی کوئی حجت -نہ میرا کوئی تم پردبائو تھا‘ میری بے دلیل پکار کو تم نے مان لیااور اللہ کے پیغمبروں کی دلیل وحجت سے بھرپور باتوں کو تم نے رد کیا تھا۔ سورۃ النساء آیت ۱۳۰ میں ارشاد باری تعالیٰ ہے۔ ’’شیطان ان سے وعدے کرتا اور آرزوئیں دلاتا ہے لیکن شیطان کے یہ وعدے محض دھوکہ ہیں۔‘‘
ترجمہ :۔ اور جب ہم نے فرشتوں کوحکم دیا کہ تم آدم کو سجدہ کرو تو ابلیس کے سوا سب نے سجدہ کیا‘ وہ جنوں میں سے تھا‘ اس نے اپنے پروردگار کی نافرمانی کی‘ پھر بھی تم اسے اوراس کی اولاد کومجھے چھوڑ کر اپنا دوست بنارہے ہو؟ حالانکہ وہ تم سب کا دشمن ہے‘ ایسے ظالموں کا کیا ہی برا بدل ہے۔ (الکھف۔۵۰)
آیت مبارکہ میں جہاں فرشتوں کا حکم الٰہی سے حضرت آدم علیہ السلام کو سجدہ کرنے کے بارے میں ذکر فرمایا گیا ہے وہیں اس بات کی خبر بھی دی جارہی ہے کہ ابلیس فرشتوں میں سے نہیں بلکہ وہ جنوں میں سے تھا‘ اس کامطلب ہے کہ ابلیس جن تھا فرشتہ نہیں تھا چونکہ وہ فرشتوں کے ساتھ موجود تھا اس لئے وہ بھی اس حکم میں شامل تھا لیکن جن اللہ کی صاحب اختیار مخلوق ہیں اس لئے اس نے اپنے اختیار سے کام لے کر اللہ کی نافرمانی کی۔ آیت مبارکہ میں اللہ تبارک وتعالیٰ اپنے ایسے تمام بندوں کو آگاہ فرما رہا ہے جو یہ جانتے بوجھتے ہوئے کہ ابلیس بارگاہ الٰہی کامردود ولعین اور راندہ درگاہ ہے اوراللہ تعالیٰ قرآن حکیم میں بھی بار بارارشاد فرما رہا ہے کہ ابلیس تمہارا کھلا دشمن ہے اس لئے جو بھی اللہ تعالیٰ کو چھوڑ کر شیطان اور اس کی ذریت کو دوست بنائے گا یعنی احکام الٰہی سے انحراف کرے گا اور شیطان کی پیروی کرے گا وہ درحقیقت خود پر بڑا ہی ظلم کرے گا ایسے لوگوں کو اور اہل ایمان کویہ اطلاع بھی دی جارہی ہے کہ اللہ تعالیٰ ایسے نافرمان ظالموں کو ان کے برے اعمال کابڑا ہی برا بدلہ دے گا‘ اللہ تعالیٰ تو اپنے بندوں کی بہتری اور فلاح چاہتا ہے اس لئے اس نے بار بار ہر قوم قبیلے میں اپنی ہدایت ورہنمائی کے لئے اپنے پیغمبر بھیجے تاکہ اس کے بندے باخبر رہیں کہ شیطان جس کی وہ پیروی کررہے ہیں وہ نہ صرف ان کا دشمن ہے بلکہ وہ تو روز اول سے تمام انسانوں کے باپ حضرت آدم علیہ السلام کا بھی دشمن چلا آرہا ہے‘ انسان سے اس کی دشمنی میں کمی کے بجائے روز بروز اضافہ ہو رہا ہے۔ اس سخت ترین تنبیہہ اور ہدایت وتاکید کے باوجود بھی انسان اپنے اختیار