انتظار کا موسم… نسیم ارشد 

ایک طویل تھکادینے والے مرحلے سے گزر کر جب وہ خواب گاہ میں پہنچا تو مارے حیرت کے چکرا کر رہ گیا۔ محترمہ مہر یعنی دلہن صاحبہ سیاہ جینز اور سفید لان کے کلیوں والے کُرتے میں ملبوس انتہائی انہماک سے کمپیوٹر پر مصروف تھیں۔ مہندی رچے ہاتھوں کی مخروطی انگلیاں سبک روی سے کی بورڈ پر محترک تھیں۔ چہرہ بالکل صاف شفاف تھا۔ بیوٹیشن کی محنت واش روم میں بہہ چکی تھی اور ساتھ ہی وہ تگڑی سی رقم بھی جو بیوٹی سیلون میں ادا کی گئی تھی۔ ہیئر اسٹائل شاید بہت پیچیدہ تھا۔ تبھی تو ڈریسنگ ٹیبل پر ہیئر پنز کا ڈھیر پڑا تھا۔ کچھ پنیں ہلکے انگوری کارپٹ پر بکھری ہوئی تھیں۔ عروسی لباس بیڈ پر ڈھیر تھا اور زیورات ڈریسنگ ٹیبل پر… بالوں کو کس کے جوڑے کی شکل دی گئی تھی‘ عمر نے طویل سانس خارج کرتے ہوئے جائزہ مکمل کیا۔
کی بورڈ ہنوز کھٹ کھٹ چل رہا تھا یعنی اس کی موجودگی کا کوئی اثر نہیں تھا۔ وہ بالکل متوازن انداز میں چلتا ہوا وارڈ روب کی طرف گیا اور شب خوابی کالباس نکال کر واش روم میں چلا گیا۔ پچیس تیس منٹ شاور لے کر اس نے اپنا دماغ ٹھنڈا کیا اور باہر آیا تو وہ اسی طرح مصروف تھی گویا اگلی پچھلی کسر آج ہی پوری کرے گی اور تمام رکے ہوئے کام آج ہی مکمل ہوں گے۔ وہ آئینے کے سامنے کھڑا ہوکر بال برش کرنے لگا‘ ساتھ ہی اس نے آئینے میں سے مہر کا جائزہ لیا۔ اس کے چہرے پر انہماک کی بنا پر ایک متفکر تاثر تھا۔ کافی دیر عادتاً بال سنوارنے کے بعد وہ پلٹ کر روم فریج کی طرف گیا۔ ٹھنڈے دودھ کا گلاس اور سیب لے کر وہ بڑے سکون سے صوفے پر بیٹھ گیا۔ مہر کی مصروفیت میں کوئی کمی نہ ہوئی‘ وہ سیاہ فائل سامنے رکھے برق رفتاری سے ٹائپ کرتی چلی جارہی تھی۔ گلاس خالی کرکے اس نے میز پر رکھا اور بیڈ کی طرف گیا لیکن بیڈ پر ریشمی کپڑوں کا ڈھیر پڑا ہوا تھا۔
’’مہر…!‘‘ وہ چلتا ہوا اس کے پاس جاکر اس کے پیچھے کھڑا ہوگیا۔ مہر کے ہاتھ سیکنڈ کے دسویں حصے کے لیے رکے پھر متحرک ہوگئے۔ ’’مہر!‘‘ اس نے مہر کے شانے پر ہاتھ رکھا اور اپنی طرف متوجہ کرنا چاہا۔
’’کیا ہے؟‘‘ اس نے پلٹ کر دیکھنا بھی گوارا نہ کیا۔ انداز بالکل سپاٹ تھا۔
’’بیڈ پر سے اپنا لباسِ فاخرہ اٹھائو‘ مجھے نیند آرہی ہے۔‘‘ وہ کرسی دھکیل کر اٹھ کھڑی ہوئی۔ وہ وہیں کھڑا مانیٹر پر نگاہیں جمائے ہوئے تھا۔ مہر کوئی اسائنمنٹ ٹائپ کررہی تھی۔ رف میں بہت زیادہ کٹنگ اور اوور رائٹنگ تھی۔ عمر سیاہ فائل میں کلپ صفحات کو سرسری نظر سے دیکھنے لگا۔ وہ وہیں کھڑا تھا جب مہر دوبارہ کرسی گھسیٹ کر بیٹھ گئی۔ اس نے پلٹ کر بیڈ کی طرف دیکھا وہی ڈھیر اب صوفے پر پڑا تھا۔ عمر نے لمبی سانس کھینچ کر موتیے اور گلاب کی مہک کو اپنے اندر جذب کیا۔
’’مہر! مجھے بے ترتیبی سے الجھن ہوتی ہے‘ یہ سب ٹھیک نہیں۔‘‘ اس نے ناپسندیدہ نظروں سے ڈریسنگ ٹیبل پر بکھرے زیورات اور صوفے پر پڑے لباس کو دیکھا۔
’’مجھے سے زیادہ کون جانے گا کہ تم زندگی میں ہر کام کو کس قدر ترتیب اور صفائی سے کرنے کے عادی ہو۔‘‘ مہر نے اس کی کمرے میں موجودگی کے ایک گھنٹے میں پہلی بار کوئی لمبی بات کی تھی۔ انداز سرد تھا‘ لفظ بہت چبا چبا کر ادا کیے گئے تھے۔
’’اچھا! اتنا جانتی ہو مجھے؟‘‘ وہ زیر لب مسکرایا۔ مہر کی نگاہیں مانیٹر پر تھیں‘ وہ چپ رہی۔ ’’جب جانتی ہو تو مانتی کیوں نہیں؟‘‘ کچھ دیر کے توقف سے وہ گویا ہوا۔ ’’سمجھتی کیوں نہیں ہو؟ بولو!‘‘ اس نے نرمی سے مہر کے کندھے کو چُھوا۔
’’بیڈ خالی ہوچکا ہے ‘ سوجائو اور مجھے کام کرنے دو۔‘‘ اس نے عمر دراز کے ہاتھ کو جھٹکا۔ عمر کی اَنا پر کاری ضرب پڑی‘ ہونٹ بھینچ کر اس نے خود پر قابو پایا۔
’’اگر تم نے چند سیکنڈ کے اندر یہ فضول کام نہ چھوڑا تو میں کمپیوٹر آف کردوں گا۔‘‘ اس نے پھرکوشش کرکے اپنا لہجہ معتدل رکھا۔ ’’کم آن مہر!‘‘ اس نے کی بورڈ پر چلتے اس کے ہاتھ کو تھاما۔ مہر نے ایک جلتی ہوئی نگاہ اس پر ڈالی اور پھنکارتی ہوئی اٹھ کھڑی ہوئی۔
’’میرے ذاتی معاملات میں دخل دینے کی کوشش مت کرنا اور ہاں مجھے ہدایات لینے کی عادت نہیں ہے۔ سمجھے تم!‘‘ عمر نے کوئی تاثر نہ دیا۔ ’’تمہیں صرف بے ترتیبی سے الجھن ہوتی ہے اور مجھے تمہارے وجود سے‘ تمہارے نام سے حتیٰ کہ تمہارے خیال سے بھی الجھن ہوتی ہے۔ بتائو کرسکتے ہو ترتیب درست…؟ اگر میں تمہیں برداشت کرسکتی ہوں تو تم صرف یہ بے ترتیبی برداشت نہیں کرسکتے؟ تمہیں کرنی پڑے گی۔ کچھ لو کچھ دو۔ سمجھے!‘‘ وہ دھیمے لہجے میں غرائی۔
’’تمہاری کچھ لو اور کچھ دو کی پالیسی ٹھیک نہیں ہے۔ میں تو تم سے عشق کرتا ہوں اور جواباً تم…‘‘ اس نے باقی باتوں کو نظر انداز کردیا۔ غالباً اسے یہی ایک جملہ قابل گرفت لگا تھا۔
’’جس کے پاس جو ہو‘ وہ وہی دیتا ہے اور رہی اس نام نہاد عشق کی بات‘ تو تم عشق نہیں کاروبار کرتے ہو۔ کاروباری نکطۂ نگاہ سے… ہے نا!‘‘ اس نے گہرا طنز کیا۔ عمر حوصلے سے پی گیا۔
’’تم تھوڑا سا غلط بول گئیں‘ میں عشق کو صرف عشق سمجھتا ہوں۔ تم سمجھنے کی کوشش تو کرو۔‘‘ اس کی بات سنے بغیر مہر تیزی سے صوفے کی طرف بڑھی۔ بھاری لہنگا‘ دوپٹا وغیرہ اس نے بڑی مہارت سے تہہ کیا اور وارڈ روب میں رکھ دیا۔ زیورات کو ڈبوں میں بند کرکے ڈریسنگ ٹیبل کی دراز میں رکھا اور واپس اس کی طرف آئی۔ عمر نے کچھ کہنے کے لیے لب وا کیے۔

’’عمر! تم مجھے طلاق دے دو۔‘‘ اس نے جھلاہٹ میں بلا سوچے سمجھے خود کلامی کی۔ عمر کا ہاتھ پوری قوت سے گھوما اور مہر بیڈ پر لیٹ گئی۔ اس کا ایک ہی جملہ عمر کو جلا کر خاکستر کر گیا تھا‘ سارے نرم احساسات ساری مصلحت کوشی بھک سے اڑ گئی تھی۔
 ’’اب اگر  ایسی فضول بات کبھی بھی کی تو میں تمہاری جان لے لوں گا۔‘‘ عمر نے جھک کر اسے کندھوں سے تھام کر سیدھا کیا اور پہلی بار انتہائی سخت لہجے میں تنبیہہ کی پھر اسے جھٹکتے ہوئے سیدھا ہوگیا۔ مہر کی آنکھوں میں سیلاب اتر آیا تھالیکن عمر نے رخ پھیر لیا تھا۔
’’میری نرمی کا اس قدر ناجائز فائدہ… بہت غلط بات ہے مہر!‘‘ وہ محض سوچ کر رہ گیا۔ اس نے مہر کا جوڑا اٹھا کر الماری میں رکھا۔ ایک ایک کرکے سارے زیورات اکٹھے کیے اور ڈریسنگ  ٹیبل کی دراز میں رکھ کر کمپیوٹر کی طرف بڑھ گیا۔ مہر وہیں روتے روتے سوچکی تھی۔ کچھ دیر بعد اس نے پلٹ کر بیڈ کی طرف دیکھا اور اٹھ کر اس کے پاس آگیا۔ احتیاط سے کمبل اس پر ڈال کر اس نے لائٹس آف کیں اور دوبارہ کمپیوٹر کے سامنے بیٹھ گیا۔ برق رفتاری سے ٹائپ کرتے ہوئے اس نے اسائنمنٹ کے پرنٹ دوبارہ نکالے۔ شکر ہے مہر  نے اصل اسائنمنٹ نہیں پھاڑی تھی۔
 

٭…٭…٭

موبائل فون مسلسل بجنے پر اس کی آنکھ کھلی تھی۔ اس نے بمشکل آنکھیں کھول کر موبائل فون کان سے لگایا۔
مہر تم اتنی وقت کی پابند ہوکہ…‘‘
’’سوری یار! اسائنمنٹ مکمل نہیں ہوسکی۔‘‘ اس نے راحیلہ کی بات کاٹی۔
’’لیکن مہر…!‘‘ راحیلہ حیران ہوئی
’’بس کہا نا!نہیں ہوسکی۔ پھر کیوں پیچھے پڑگئی ہو؟‘‘
’’یار! میں صرف حیران ہوں کہ تمہیں اپنے ولیمہ کے دن بھی اسائنمنٹ جمع کروانے کی فکر لگی ہوئی ہے؟‘‘
’’کیا مطلب…؟‘‘
’’مطلب  یہ کہ تمہاری اسائنمنٹ سر نصیر تک پہنچ چکی ہے اور  میں حیران ہوں کہ تم شادی انجوائے کرنے کی بجائے کتابوں میں مغز ماری کررہی ہو۔ خدا کا خوف کرو مہر!‘‘ راحیلہ نے اطلاع دینے کے ساتھ ساتھ اسے ڈانٹا۔
’’اچھا! ٹھیک ہے‘ اللہ حافظ۔‘‘ اس نے جلدی سے لائن کاٹ دی۔ ساری سستی حیرانی کی نذر ہوچکی تھی۔ ’’اسائنمنٹ کیسے پہنچی۔ عمر دراز؟ نہیں‘ وہ صرف کمینگی دکھا سکتا ہے۔ اب خود تو چل کر اسائنمنٹ جانے سے رہی۔‘‘ کوئی سرا ہاتھ نہیں آرہا تھا۔ ’’صبح ہی صبح یہ انکشاف ہونا تھا۔‘‘ اس نے بدمزگی سے ٹائم دیکھا۔ ’’اوہ! ایک بج چکا ہے‘ (دوسرا انکشاف)ٖ۔‘‘ وہ واش روم  کی طرف بڑھ گئی۔ عمر کمرے میں نہیں تھا۔ وہ فریش ہوکر آئی تو ملازمہ ناشتا لاچکی تھی۔
’’میں ناشتا ڈریسنگ روم میں کروں گی۔‘‘ اس نے خاصی نخوت سے کہا اور بال سلجھانے لگی۔ملازمہ خاموشی سے ٹرالی واپس لے گئی۔ تھوڑی دیر بعد وہ ڈائننگ روم میں پہنچی تو لائونج اور دوسرے کمروں میں گہما گہمی نے اسے چونکا دیا۔ وہاں قریبی عزیز رشتہ دار تھے‘ جو شادی میں شرکت کے لیے آئے تھے۔ وہ اِدھر اُدھر دیکھے بغیر کرسی کھینچ کر بیٹھ گئی اور چائے پینے لگی۔ ایک دن کی دلہن دن کے ڈیڑھ بجے ڈائننگ روم میں اکیلی ناشتا کررہی تھی۔ عمر کی بہن تارا آپی نے عمر کو وہاں بھیجا تاکہ رشتہ داروں کے سامنے ہونے والی ممکنہ شرمندگی سے بچا جاسکے۔ عمر نے بمشکل تمام ایک کپ چائے زہر مار کی ورنہ بے وقت اتنی گرمی میں وہ بھی دن کے اس حصے میں چائے پینا اسے بہت ناگوار لگ رہا تھا۔ اسے سامنے بیٹھ کر چائے پیتا دیکھ کر مہر کے انداز تیکھے ہوگئے۔
’’اچھی طرح فارمیلیٹز پوری کرواتی ہوں تمہیں…‘‘ اس نے دانت پیستے ہوئے سلائسز کی پلیٹ اپنی طرف کھسکا لی اور سلائس پر بڑی باریک بینی سے مارجرین لگانے لگی۔کافی دیر بعد اس کام سے فارغ ہونے کے بعد اس نے کارن فلیکس میں چمچ چلانا شروع کردیا پھر آملیٹ اپنی پلیٹ میں رکھ کر اس کی چھوٹے چھوٹے ٹکڑے اٹھا کر منہ میں رکھے۔  ’’تاج! اخبار لائو۔‘‘ اس نے تلے ہوئے انڈے پر سیاہ مرچ چھڑکتے ہوئے بڑی فرصت سے ملازمہ کو پکارا۔ عمر چائے ختم کرچکا تھا۔ اب اس کی تائو دلانے والی فضول حرکتیں دیکھ کر اس کا خون کھولنے لگا۔ ملازمہ اخبار لے کر حاضر ہوگئی۔ ادارتی صفحہ کھولتے ہوئے اس نے نیا حکم جاری کیا۔ ’’تاج! میں ناشتے میں جوس پیتی ہوں۔ ایک گلاس جوس لائو فوراً…‘‘ وہ اطمینان سے اخبار پڑھنے لگی۔ عمر کا جی چاہ رہا تھا اس کا گلا دبا دے۔ چند منٹ بعد تاج جوس لے آئی۔ اب مہر کیا کرتی۔ وہ توناشتے میں بمشکل چائے کا ایک کپ اور مکھن لگے سلائس لیتی تھی‘ بے وقت ناشتے نے ویسے ہی بھوک اڑا دی تھی۔ مارے باندھے اس نے محض عمر کو دکھانے کے لیے ایک دو گھونٹ جوس کے پیئے۔ اسی وقت عمر کا سیل فون بج اٹھا۔ اس نے یک گونہ سکون محسوس کرتے ہوئے سیل اٹھایا اور ڈائننگ روم سے نکل گیا۔ اب بیٹھنا بے کار تھا۔ اخبار اٹھا کر مہر اپنے کمرے میں چلی آئی۔